Barack Obama akosoa viongozi wenye kauli za kibaguzi, awataka Wamarekani kuwakataa watu wanamna hiyo

Rais wa zamani wa Marekani Barack Obama amewataka Wamarekani kukataa lugha za chuki na kibaguzi kutoka kwa viongozi wao.

Bw Obama amekuwa akiongea kwa nadra tangu alipoondoka madarakani, na japo hakumtaja kiongozi yeyote kwa jina, lakini kauli yake hiyo imekuja baada ya Rais Donald Trump akiwa katika harakati za kujinasua kuwa kauli zake dhidi ya wahamiaji ndizo chanzo cha kuchochea mauaji nchini humo.

Katika hotuba yake jana Jumatatu, Trump alikemea ubaguzi wa rangi. Jumla ya watu 31 wameuawa katika mashambulio ya bunduki kwenye majimbo ya Texas na Ohio mwishoni mwa wiki.

Akiwa madarakani, Obamaalipigana pasi na mafanikio kudhibiti umiliki wa silaha za moto nchini Marekani. Aliiambia BBC mwaka 2015 kuwa, kushindwa kupitisha kwa sheria za kudhibiti silaha ndilo jambo kubwa alilofeli akiwa kama kiongozi wa nchi hiyo.

Obama amekuwa akikwepa kuzungumzia sera za Trump, hususani ya uhamiaji ambayo imekuwa ikipingwa na makundi tofaouti, hata hivyo, safari hii ametoa tamko.

“Inabidi kwa pamoja tukatae lugha zinazotoka kwenye kinywa cha kiongozi wetu yoyote ambaye analisha mazingira ya uoga na chuki ama anayefanya ubaguzi kuwa jambo la kawaida. Viongozi ambao wanawafanya watu ambao hawafanani nasi kuonekana kama mashetani, ama wanaodai kuwa watu wengine ikiwemo wahamiaji wanahatarisha mfumo wetu wa maisha, ama wanaodai kuwa Marekani ni ya jamii moja tu ya watu,” amesema Obama.

Trump amesema nini zaidi?

Raisi wa Marekani Donald Trump amekemea chuki na imani kuwa mtu mweupe ana nguvu zaidi alipohutubia Umma baada ya tukio la mashambulizi yaliyogharimu maisha ya watu 31 katika miji ya Texas na Ohio.

Ametaka mabadiliko katika udhibiti wa silaha, na ametaka hukumu ya kifo iwakabili watu wanaotekeleza mauaji ya watu wengi, na kutazama tena sheria zinazohusu silaha.

”Ugonjwa wa akili na chuki hufyatua risasi, na si silaha,” Trump alisema, akizungumza katika Ikulu ya Marekani siku ya Jumatatu.

Hakuonyesha kuunga mkono hatua za kudhibiti bunduki zilizopendekezwa katika Congress.

“Kwa sauti moja, taifa letu lazima likemee ubaguzi wa rangi, uhasama na mtazamo kuwa watu weupe ndio wenye nguvu,” Bwana Trump alisema Jumatatu. “Mawazo haya mabaya lazima yashindwe. Chuki haina nafasi Amerika.”

Maoni yake yalikuja muda mfupi kabla ya mtuhumiwa katika El Paso, Texas, kushtakiwa kwa mauaji . Polisi wa El Paso pia walithibitisha Jumatatu kuwa waathirika wengine wawili walikufa hospitalini, na idadi ya vifo vya Texas iliongezeka kufikia 22.

Rais alielezea sera kadhaa, ikiwemo pamoj ushirikiano zaidi kati ya wakala wa serikali na kampuni za vyombo vya habari vya kijamii, mabadiliko ya sheria za afya ya akili na kumaliza “utukufu” wa ghasia katika utamaduni wa Amerika.

Alitaka sheria kali zitakazoruhusu watekelezaji wa sheria kuchukua silaha kutoka kwa watu wanaoaminika kuwa tishio kwao wenyewe au kwa wengine.

Bwana Trump alisema mashirika ya serikali lazima yaweze kufanya kazi kwa pamoja na kubaini watu ambao wanaweza kufanya vitendo vya ukatili, kuzuia upatikanaji wao wa silaha za moto na pia alipendekeza kuwaweka kizuizini bila hiari kama njia ya kuwazuia washambuliaji.

Alisema pia alielekeza wizara ya sheria kupendekeza sheria kuhakikisha wale wanaotenda uhalifu wa chuki na mauaji ya watu wengi wanakabiliwa na adhabu ya kifo.

Rais alikosoa video za mitandaoni kwa kuchochea vurugu katika jamii.

“Ni rahisi sana leo kwa vijana wenye shida kujiingiza kwenye utamaduni unaosherehekea vurugu,” alisema. “Lazima tuzuie au kupunguza hii na inapaswa kuanza mara moja.”

Lakini hakuzungumzia ukosoaji kuhusu msimamo wake mkali dhidi ya uhamiaji haramu, ambao wapinzani wanasema umechangia kuongezeka kwa mashambulio yanayochochewa na ubaguzi.

Rais hapo awali alikuwa akiandika kwamba watunga sheria katika Congress wanapaswa kupitisha sheria za ukaguzi wa nyuma kwenye kifurushi na “mageuzi ya uhamiaji yanayohitajika sana”.

Bwana Trump aliendelea kusema kuwa “yuko wazi na yuko tayari kujadili maoni yote ambayo yatafanya kazi” na akasema wanasiasa wa Republican na Democrats wanapaswa “kuungana pamoja kushughulikia hili.

Kilichotokea El Paso

Wachunguzi wanatazama kama shambulio lilichochewa na chuki, huku ikielezwa kuwa adhabu inaweza kuwa kifo.

Takriban watu 20 waliuawa huku wengine 26 wakijeruhiwa katika ufyatuliaji wa risasi katika duka la jumla mjini El Paso jimbo la Texas .

Gavana wa jimbo hilo Greg Abbot alitaja shambulio hilo kuwa mojawapo ya siku mbaya zaidi katika historia ya jimbo la Texas. Maafisa wa polisi wanachunguza iwapo shambulio hilo ambalo lilifanyika maili chache kutoka kwa mpaka wa Marekani na Mexico lilikuwa la uhalifu wa chuki.

Mtu mwenye umri wa miaka 21 kwa sasa anazuiliwa na maafisa wa polisi.

kilichotokea Dayton

Kanda za video katika mitandao ya kijamii iliwaonyesha watu wakikimbia huku milio mingi ya risasi ikisikika katika barabara.

Inadaiwa kwamba shambulio hilo lilifanyika nje ya klabu ya burudani ya Red Peppers katika barabara ya tano ya E .

Klabu hiyo baadaye ilichapisha katika mtandao wa twitter ikisema wafanyakazi wake wako salama.

Polisi wanasema kuwa wote walioathirika walikuwa barabarani.

Polisi wanasema kwamba mshukiwa huyo alikuwa akiishi katika eneo la Allen , Dalla yapata kilomita 1,046 mashariki mwa El Paso. Ametajwa na vyombo vya habari vya Marekani kuwa Patrick Crusius.

Kanda za video za CCTV zilizodaiwa kuwa za mshambuliaji huyo ambazo zilionyeshwa katika vyombo vya habari vya Marekani zinaonyesha mtu aliyekuwa amevalia Tishati nyeusi pamoja na vilinda masikio.