Ubelgiji wamaliza msimu wa Ligi kibabe, bingwa apatikana
Club Brugge imetawazwa kuwa Mabingwa wapya wa ligi kuu nchini Ubelgiji ‘Jupiter Pro League’ kwa msimu wa mwaka 2019/20 mara baada ya Bodi ya Wakurugenzi kukubaliana.
Klabu ya soka ya Club Brugge
Hatua hiyo imefikiwa kufuatia kuendelea kusambaa kwa virusi hatari vya Corona barani Ulaya na kupelekea kusimamishwa kwa mashindano mbalimbali barani humo.
Ligi ya Ubelgiji imekuwa ligi ya kwanza kufikia maamuzi hayo huku nchi nyingi zikisubiri hali endapo itakuwa shwari hapo baadaye ili ziweze kumalizia msimu. Kwa mujibu wa wakurugenzi waliopiga kura kuamua msimu wa ligi nchini humo, wamesema kuwa suala la haki za matangazo ya ligi hiyo litajadiliwa April 15.
Chama cha soka nchini Uingereza FA kinatarajia kukaa pamoja na klabu zote za ligi hivi karibuni kujadili juu ya mustakabali wa ligi kuu nchini humo EPL na ligi daraja la kwanza ‘Championship’.
Wakati huko Hispania, LA Liga ilipitisha uamuzi wiki iliyopita kuwa mechi zilizobakia hazitachezwa hadi hapo virusi vya Corona vitakapomalizika, hali ikiwa hivyo hivyo kwa nchi ya Italia ambayo ndiyo yenye maambukizi mengi ya virusi vya Corona barani humo, huku idadi ya vifo ikiwa ni zaidi ya 13000.
