SADC yaiunga Mkono DRC, yataka hatua kali dhidi ya M23
Viongozi wa mataifa ya Jumuiya ya Maendeleo ya Nchi za Kusini mwa Afrika (SADC) wametangaza uungaji mkono thabiti kwa Jamhuri ya Kidemokrasia ya Kongo (DRC) katika mapambano yake dhidi ya waasi wa M23 wanaosaidiwa na Rwanda, ambao wameuteka mji wa Goma.
Mkutano wa dharura wa viongozi wa SADC uliofanyika Zimbabwe ulilenga kujadili mzozo unaoendelea mashariki mwa Kongo, huku usalama wa kikanda ukiendelea kuwa suala nyeti. Kongo ni miongoni mwa wanachama 16 wa jumuiya hiyo ya kikanda, na mgogoro wake umekuwa na athari kubwa kwa majirani zake.
Mkutano huo ulifanyika baada ya wanajeshi 16 kutoka Afrika Kusini na Malawi kuuawa katika mapigano ya karibuni karibu na Goma. Wanajeshi hao walikuwa sehemu ya kikosi cha kulinda amani cha SADC kilichopelekwa mashariki mwa Kongo tangu Desemba 2023.
SADC ilisema operesheni zake za kudumisha amani bado hazijafanikiwa kikamilifu, ikitoa wito wa kutumwa kwa maafisa wa ulinzi kutoka nchi zenye vikosi katika kikosi cha amani ili kufanya tathmini ya hali ya wanajeshi waliopo katika eneo hilo.
Mbali na Afrika Kusini na Malawi, Tanzania pia ni miongoni mwa mataifa yenye wanajeshi katika kikosi hicho cha amani. Taarifa hiyo ilisisitiza haja ya kuitishwa kwa mkutano wa pamoja kati ya SADC na Jumuiya ya Afrika Mashariki (EAC) ili kutathmini hali ya usalama nchini Kongo na kujadili mkakati wa kusonga mbele.
Jumuiya hizo mbili zimehusika kwa kiasi kikubwa katika juhudi za kusaka amani mashariki mwa Kongo, huku mgogoro huo ukizidi kuwa changamoto ya kikanda inayohitaji mshikamano wa kimataifa katika kuitatua.
