Serikali yatoa tamko kufuatia tukio la Mwalimu kumchapa mwanafunzi viboko hadi kumuua ‘hajatumwa, ile bahati mbaya’

Serikali imetoa tamko lake kwa mara ya kwanza tangu litokee tukio la mwalimu wa shule ya msingi ya Kibeta iliyopo Manispaa ya Bukoba mkoani Kagera kumchapa fimbo mwanafunzi wa darasa la 5 aliyejulikana kwa jina la Sperius Eradius (13) kwa tuhuma za kuibiwa mkoba.

Serikali kupitia Waziri wa Elimu, Sayansi na Teknolojia na Ufundi, Profesa Joyce Ndalichako akiongea na Waandishi wa Habari leo Jumatano Agosti 29, 2018, amesema kuwa tukio hilo lilikuwa ni la bahati mbaya na tayari hatua za kisheria zimechukuliwa.

“Muwe na amanai na utulivu katika kipindi hiki ambacho serikali inafanya kazi yake nadhani mmemsikia kamanda wa polisi mkoa wa Kagera, ameongea vizuri kabisa na hiyo ndio tamko la serikali. Yule hajatumwa na serikali kufanya yale aliyoyafanya. Na niwahakikishie wananchi kuwa shule ni sehemu salama kwa hiyo asitokee mtu ambaye akafanya vitendo ambavyo vitamfanya mzazi au watotot waone shule kuwa sio sehemu salama,“amesema Prof. Ndalichako na kusisitiza kuwa tukio hilo lilikuwa ni bahati mbaya.

“Kwa hiyo ni bahati mbaya ambayo imetokea, lakini bahati mbaya hiyo kwa namna yoyote ile isije ikatafsiriwa kama ndio sasa shule sio sehemu salama, na yoyote yule anayehatarisha usalama shuleni serikali itamshughulikia kwa nguvu zote. Kwa sababu serikali inaamini elimu ndio nyenzo muhimu ya maendeleo ndio maana serikali kwa mwezi inatoa bilioni 20 kugharamia elimu.“amemaliza Waziri Ndalichako.

SOMA KWA UFUPI KUHUSU TUKIO LA MWALIMU HUYO LILILOPELEKEA  KUMCHAPA MWANAFUNZI HUYO HADI KIFO:

Mwanafunzi wa darasa la 5 katika Shule ya Msingi Kibeta, Sperius Eradius(13) amefariki dunia akidaiwa kupigwa na mwalimu wake kwa kutuhumiwa kuiba pochi ya mwalimu

Baadhi ya Wanafunzi walioshuhudia tukio hilo lililotokea jana (Juzi Jumatatu) wamesema mwanafunzi huyo alikwenda kumpokea mizigo mwalimu wake aliyefika shuleni hapo kwa usafiri wa bodaboda

Alipoingia ofisini Mwalimu huyo alianza kulalamika kutoiona pochi yake ndipo Sperius alipoitwa na kuhojiwa lakini akakana kuichukua hali iliyosababisha kuanza kupigwa akitakiwa kuirejesha

Aidha, waliongeza kuwa baadaye walitakiwa kuitafuta pochi hiyo hadi chooni, lakini hawakuiona huku mwanafunzi huyo akiendelea kuadhibiwa

Hata hivyo, dereva bodaboda alifika shuleni hapo akimtafuta mwalimu aliyepoteza pochi na kumkabidhi pochi aliyokuwa ameisahau kwenye pikipiki yake

Mganga Mfawidhi wa Hospitali ya Rufani ya Mkoani humo, Dkt. John Mwombeki, alikiri kupokea mwili wa mtoto huyo majira ya saa mbili asubuhi ukionekana kuwa na majeraha.